Vur iederiën
deen ni mier is
ma aaltied
oonder ôs…
Vur iederiën
din in iën kier
inens ma
zoonder môs…
Vur iederiën
deen is gegoan
vur iederiën
di bleef bestoan:
Wet daat geej
mit iedere troan
Waat op oow wange schrieft:
Naat stripke zalt
‘ik halt vaan oow’
Daat is waat aaltied blieft…
En troan die zoë
na oonder sluit,
zörgt daat dur wer
waat moëis opbluit!
Daa’s ok ni te filleme wa?
GvdM
Tillevisie kieke is ni leuk mier. Laatst heb ik nag en kier en stukske film gezi, tusse de reclame. Ma umdaat de reclame meej ni interesseerde, heb ik de rest vaan de film ni mier afgekeke. Hiël duk is reclame waal un oplossing. Daat is wannier dur knommel op is. Beejveurbeeld Sazia Mourali, die aan slumme brugklassers (?) vroage stelt. In ut begeen vaan ut programma mot zeej die kiender op eur gemaak stelle. Daat kaan ze net zo min aas daat ze die vroage wet. Ut ontgiët ur, gans. En daan de klier die ze aanheat. Volgens mee motte die brugklassers aalle veer en kliëdingstuk meibrenge, en daat setje deut zeej daan a. Daan zuut ze dur joonk oet en huurt ze beej de doelgroep, ment ze. Is aallebei ni woar. Ut gehiël is vaan zon triestig niveau, daat ge hopt daat tur wer gauw reclame keumt. En daat is tur zoë. Wette trouwes daat Sazia nag en programma het gedoan, of meschien nag waal deut? Doa mot ze juus de strenge meisteres speule. Ze mot daan hiel scherp en adrem lieke en de kandidate afzeike aas die en fout make. Ge zöt wille daat die kandidate in de ierste roonde aallemoal ‘Sazia’ opschreve… Want ut is toch duudeluk wie ellekes kiër de zwaakste schakel is? Trouwes ok dit programma is gejat vaan dun engelse zender, zoeaas zoveul. Ut is soms zò duudeluk daat koste én moeite gespaard zie..
Ne, tillevisie kieke is nu leuk mier. Haart vaan Nederland, RTL Boulevard, Showtime. Mit oonderwerpe die ge anders aalt beej de kapper lest, dus zoonder noa te denke ok geknipt vur tillevisie. Vroeger woort daat gedoan door iëne presentater en daat ging gemekkeluk. Hiël veul hoofde di toch ni te zegge. Teggewoarig motte daat minstes twië presentatore zie. Twië kier en IQ vaan vieftig is ok hoonderd zulle ze doa waal denke. Beej RTL Boulevard zitte dur veer…
Aas ge efkes ni let op waat ze zegge, da kunde waal verwoonderd kieke noa hoe ze elkaar hiël spontaan, hiël natuurlijk en hiël adrem aavulle. Daobeej blieve ze de kiekers miësten tiëd waal aakieke. Daat motte thoes zelf is probere. Godde nevve oow vrouw of oowe mins zitte, strak veuroet blieve kieke en da probere um precies um de beurt, vlak na elkaar, waat zinnigs te zegge. Bel efkes aas daat lukt…
Geej wet toch ok waal, hoe ze daat doa doon? Ze presentere ni miër echt, ze leaze oow waat veur. En doameij zien we mit zien aalle terug op ut niveau vaan de bewaarschoel, woa ge ut wáál leuk voongt, aas de juf waat veurloos. Alliën haadde toen aas kleuter aal zoveul verstand, daat ge daat kost zi aan ut book daat ze vast haaj. Nou denke ze op dun tillevisie daat ge zelfs daat ni mier in de gate het…
Tillevisie kieke is ni leuk mier. RTL zeuve is opgericht om de programma’s vaan RTL veer, vief en zes ennen daag later terug te kunne kieke. Ech woar. Doa hebbe ze zelfs reclame vur gemaakt. ‘Je hoeft nu écht niets meer te missen’. Zuije ze in Hilversum wiëte waat weej heer in Limburg bedoele aas weej zegge ‘daat ge echt niks mier te misse het’? Haaj Rowwen Hèze eur ontwikkelingswerk ma afgemaakt. Ut zuij toch en kwestie vaan gedeuld zie? Ierlukheidshalve mot ik zegge dat TV Limburg en L1 ok mien favoriete zenders neet zien. Mien gedeuld is gewoën op, denk ik. Ik kiëk ni mier. Hiël soms nag na Reindonk, ma aalliën aas ze ‘leavend’ zie, Horsters proate en dur gen reclame vaan Bovee Keukens tussendoor keumt…
GvdM
Waat ge ni zit, is ni te filleme!
Zudde meine, ma waat bliekt?
Dop d’r nag op…Waat wille we..
Daat zidde wáál, aas ge ma kiekt!
mit oowe stomme kop
d’n dop d’r tomme op
eikel…
ni te filleme..
GvdM
Waat zödde wille peempe
Aas ‘t good is hoe ut is?
Daas net zoe iets aas kreempe
Vaan waat aal hiel klein is
Daat haet gen nut, dus dut ma ni
Loat gaon zoe aas ut giet
Waat ge ok dut, lot aaltied zi
Daat ‘echtheid’ nag bestiet
Te heit, da giet ut kreempe
Te kalt, da vruus ut a
Ni good, da kund ’t peempe
Ma ‘echt’ verluus ut da..
GvdM
Wie haet Rinus gezi toen Johan I oetkwoam?
Aas ge ut haet ovver peempe, daan zudde Rinus enne zelf-peemper moge neume:
ellekes kier wer baeter daan ie zelluf al woar.
Heer volgt en ierbetoën aan enne moeïe meens…
In zien eige fotobook stiet ut iën en ander ovver eum geschreve:
In ’63 dun ierste preens, deen ie aaltied is gebleve
Umdaat, zoeaas ie ‘t zelf zag, heej ‘t geluk haaj um te boffe..
Toen de viefenvertigste preens oetkwaom, leek Rinus te ontploffe
En waat ie aan beer misschien en bitje te veul haaj
Makte ie ruum good door aalle wört die ie doa te kort kwoam…
‘Leuk, geweldig en weej motte same, iederien…
Man, geweldig, iederien same… en weej… allemoal..’
Ma ok: ‘Daat nou, 44 jaor laater, zoonder iemus te kort te doon…’
‘Man, waat leuk, waat good, weej allemaol en iederien…’
‘wer enne vaan de Mulder, man waat moei, ni da, prachtig…’
‘ni te gelueve, man, te gek, geweldig, waat toch machtig’
Gröts daat ie waas, d’n ierste preens,
zoa laevesblie, ontwapenend woarachtig,
ontiegeluk moei en taegeliek
zoa ierluk en zoa krachtig
en ok al proat ie soms waat veul
of zaet ie daan wer juust waat wienig
ut veur woameij daat aaltied kleenkt
haet Rinus ma allienig
Zien wört goan rechtstreeks noa ut hàrt,
Mit kracht, woa ik gen wort vur wiët
en kracht die -daat is hiel apaart-
beej ni veul meense zoë bestiët.
Zien veur vaan spraeke: ongewoën
um durrum besloet ik heer ok plechtig
aas sloetstuk vaan dit ierbetoën
‘mit veur spraeke’ hèt vort ‘rinus-echtig’
GvdM
Peempe = Anders make; baeter make; neej make
Oppeempe = Ánders opmake; baeter opmake; opneej make
Aas peempe utzelfde is aas oppeempe
Daan zuij anders make utzelfde zien aas anders opmake
Baeter make utzelfde aas baeter opmake
En neej make utzelfde motte zien aas opneej make.
Aas peempe utzelfde is aas oppeempe
Daan zuij dus verandere utzelfde zien aas schmienke
Daan zuij geneze utzelfde zien aas gen geld oppotte
En zuij oetvinge utzelfde zien aas recycele.
Ge vult um aal aankome
Mit schmienke kunde waal iemus verandere
ma ge geneest ni sneller aas ge geld oppot
en recycele hooft allang ni mier te waere oetgevonge
mit andere wört:
peempe is ni utzelfde aas oppeempe
die zegge daat daat waal zoe is
die denke daor te gemekkelijk ovver.
Ge zit zelluf hoe snel zoeiets fout gezag ka waere
Niks ‘contaminatie’ ma gewoën op twie vingers noatelle
Optelle eigeluk, ma waal vurzichtig,
Want is optelle waal utzelfde aas telle?
Tel dur ma neet op!
GvdM
Vurrig joar bekroop ut meej waat dukker. Waat stodde toch te doon jong, vroog ik mezelf mei af. Ge kost daat ni hure en ge merkte doa niks va, want ik tromde gewoen door. Ik haaj ut ding tenslotte ni vur niks meigenoame. Ennen daag ier haaj ik dur nag en neej vel op loate legge umdaat iemus anders d’r doorhin haaj gehouwd. D’r is niks triestigers daan en trom mit en kapot vel. Zoe hedde nag waat en zoe hedde niks mier.
Ok mien houte begeleidingsinstrument begoof ut vurrig joar. Ik wet nag daat ik daat toen en teiken aan de wand vong. Ut is ok good gewes, doch ik toen nag. Ik bin ut houte ratelinstrument nag mier joare geleeje nameluk enne kier gans kwiët gewes. Ma daags doanoa kreeg ik um woonder boave woonder vaan iemus terug. En toen woar ik vur mien geveul toch wer compleet.
Veul lol meij gehad aal die joare, mit de trom en de ratel. Zelf speule of ennen andere loate trommele terwiel ik daat daan ritmies begeleide op de houten ratel. Duk gemerkt daat veul meense, zeker aas ut waat later op d’n aovend woar, eur vroeger agelierde drumband-roffels toch beater haaje motte beejhalde… Ma ok kels taegegekome die de vonke oet ut vel slooge en in no-time de hiele tent op de kop haaje. En doa stong ik da midden-i, want ik begeleide daat daan mit mien houte ratelinstrument…
Ma vurrig joar ging ie kapot. Ik heb de stukskes nou boave in en plestiek zekske liggen. Ik kaan ze nag ni weg doon. Misschien moot ik daat ding enne kier ritueel begrave. De trom is dur nag waal. Leet wer kloar um gebroekt te waere. Ma ik twiefel. Misschien moot ik enne kier waat anders en moot ik de trom toes loate. Ma net zo misschien goj ik daat stomme ding misse. Gister beej de Kerstviering zei iemus vaan en joekskapel oet Brokeze daat ze dur op carnevalsvriedag wer zuije zie en heej knipoegde veulbeloavend. Ik heb andere joare duk mit die kapel en pittig nummerke mei moge houw beej Jan vaan ut Centrum. Waas schon. Deen oet Brokeze wis niks vaan mien twiefel en ik heb doa ok niks va gezag. Want hoe mier meense ge verteld daat ge wilt stoppe, hoe mier meense oow raar akieke aas ge daat ni dut. En daat maakt ut daan nag lastiger. Nou denkt iederien al joare, ‘doa heddum wer’ ma daan wuurt daat ‘doa heddum nag..’. En daat kleenkt toch waat triestiger. Aasof ge aal veul ier haat motte stoppe…Daat kleenkt bekant aas en kapot trommelvel en daat wilde ech ni huure. Misschien mot ik langzaam afbouwe en ni metien ‘kalde kalkoen’ stoppe. Vriedaag toch nag ma gewoen goan mit de trom. En daan zeen we waal of we die andere daag waat anders motte doon. En örgelke zuij ni gek zie…
GvdM
Dun elfde vaan dun elfde
Da zuij ut toch beginne?
Dun Echo heb ik doorgezooch
Ma hielemaol niks te vinge
Daan hedde waal de kriebels
Ma velt dur niks te viere
Haet niemus waat bedooch da?
is Pedro aan ’t censurere?
dun elfde vaan dun elfde
da begint toch aalt de gekte?
Boete is ‘t nou efkes drueg
Ma net raegende ’t daat zoa zekte
Op dreumels werreld wiede wep
stiet ‘t aavangsfiëst neet ens vermeld!
Ut begeen liekt zoema weggeloate
Aas ôf ge zoonder wört verteld…
daat kaan dus ni, daat giet te wiet
daat zien weej dreumels ni gewend
da kunde peempe waat ge wilt
ma gen begeen is ok gen end…
GvdM
‘Ik heb en kapotte moês’ waas vroeger veul minder dubbelzinnig aas teggewoarig. Daat keumt door de computers vaan vaandaag. Aas ge vroeger en kepotte moês haat, daan waas daat duk ok de bedoeling. Vaan en kepotte moês haadde gen las miër. Teggewoarig is en kepotte moês biestig lastig. Net aas en kepotte schiëf. Vroeger woar en kepotte schiëf ok lastig want da kôstte ni mier voetballe en aas ge pech haat, ok ni miër good loëpe. Aas teggewoarig ut loëpwerk vaan de schief ni miër good is, hult ut ok gauw op. Duk meine meense da daat ut aan ut mooderbord leet. Want daat kaan ok erg ziën. Teggewoarig. Vroeger ni. En kepot mooderbord goaf ni zoaveul. Da peekte en ander bord oet de kas. Ge kost dur waal duchtig smear vur kriege aas ge ut vurspress kepot haat gemaakt. Aas nou ut mooderbord puroongeluk kepot is, daan baat dur gen smaer a. En da hedde ok niks miër aan oow snelle vurbinding. Baat ni. Vroeger haadde gen snelle verbindinge. Ge woart afhankelijk vaan hoe snel de post kôs fietse. En of ie de weg kôs vinge. ’t Adres mos ok kloppe, want anders durde ut nàg veul langer. Iën meeladres haadde toen, in de Miëterik. Ma alliën aas ut weijde. Verderres haaje de miëste gewoën werk, op en paar noa, die haaje netwerk. Toen aal. Daat is nou waal anders. Nou heat iederiën zien netwerk, ma ka bekans niemus miër gewoën werke. Zoonder moês, bedoel ik. Kunde geej oow nag herinnere daat ge zoonder moês most werke? Ni? Daan kaan ut ok zie daat ge te wiënig –ôf nag erger- nou aal en slech geheuge het…
GvdM
Zoewaat en gans vur niks joar gewes
Haaj ik ut gewiëte, waas ik kloar gewes
Daan woar ik in januari aal begos
Haaj ik ut gewiëte, daan haaj daat good gekos
Dju, waat waas ik kwoad
‘Genne roeijen droad’…
En nou?
In octoeber pas huurde daat daan
Haad’ut iër gewiëte, hedde d’r waat aan
’t ganse joar ideeën veurbarig opgedoekt
Want haaj ik ut gewiëte, daan haaj ik die gebroekt
Dju, waat waas ik kwoad
‘Genne roeijen draod’…
Jao, mauw…
Daat kaan toch ni, daat ge aalles ma schrieft
Daan wette toch ni, woa daat ge daan blieft
Woa giet ut daan oaver, wie wet wie waat deej?
wie verzint vaan di wazel, Ger Gubbels geej?
‘Genne roeijen draod’…
En gauw!!
GvdM
